طريقة تحضير كرواصة

السلام عليكم و رحمة الله تعالى وبركاته

موقع ام لمى يقدم لكم حلوة بالشكلاط

مقادير
115 غ زبدة
60 غ سكر كلاصي
125 غ فرينة
2 معالق كبار كاكاو غبرة ومن أحسن يكون مسوس
2 معالق كبار حليب
رشة ملح

للتزين : 125 غ شكلاط دايب ورقائق اللوز أو لوز مهرمش



طريقة التحضير

أول حاجة نخلطو الزبدة مع السكر الصقيل حتى نحصلو على كريمة
نغربلو الفرينة والكاكاو ونضيفها للخليط ديالنا
نخلطو مزيان ونضيف جوج معالق حليب ورشة ملح
الخليط المحصول عليه خاص يكون ما قاسح بزاف ما رطب بزاف



نعملو الفرن يسخن على 180
نوضعو الخليط ديالنا في جيب الحلواني ،مكانش عندي عملت الطريقة ديال واحد الأخت في المنتدى معقلتش على اسمها الله يجزيها بخير ، كتخدي بلاستيكة غدائية وبسكين سخون كتقطعي من راس لراس المخالف له بش تحصل على جوج جيب حلواني ، هكدا عديت بنسبة لمعندهش ، وعملت فيه البوق الداخل وزيارتو بسكوتش هههه صحة خاص يصدق وربي كبير



نعملو العجين على شكل قضبان صغيرة 5 أو 6 cm طول



ندخلهم الفرن المسخن مسبقاً 12 دقيقة وضروري من ورق الفرن نكونو مفرشينو
منين نخرجهم نخلوهم يرتاحوا حتى يبردو ، أول ما تخرجو تيكونو مقرمشٍ من برا ومعلكين من الداخل ومنين تبردو تماماً تيولي عندهم نفس القوام



ندوبو الشكلاط
نغطو النص ديالهم ونزينوهم بلوز أو رقائق ديلو أو الموجود وحسب الرغبة
كجو غزالين بزاف بزاف ، متشبعوش منهم وهاد المقادير كتعطنة تقريباً 30 وحدة










بالصحة والراحة